መንፈሳዊ ምድረ በዳነት ባጠቃው ወቅታዊው ዓለም ዳግም ክርስቶስን ማወጅ

ለአንድ ዓመት የሚቆየው "የእምነት ዓመት" በቅዱስ አባታችን ታወጀ

Year_of_Faithቅዱስ ኣባታችን ር.ሊ.ጳ. ቤኔዲክቶስ 16ኛው ከትላንት በስትያ ጥቅምት ፩ ፳፻፭ ዓ.ም. የእምነት ዓመት መክፈቻ፣ የሁለተኛው የቫቲካን ጉባኤ 50ኛው ዓመትና የኵላዊት ቤተ ክርስትያን ትምህርተ ክርስቶስ ሰነድ እውን የሆነበትን 20ኛው ዓመት ዝክር ምክንያት በማድረግ በቅዱስ ጴጥሮስ አደባባይ በጠቅላላ በ400 ብፁዓን ጳጳሳት፣ ፓትርያርካት፣ ካርዲናሎችና ካህናት ታጅበው ከ20 ሺሕ በላይ የሚገመቱ ምእመናን የተሳተፉበት መሥዋዕተ ቅዳሴን ሲመሩ ባሰሙት ስብከት፦  ክርስቶስን የማወጅ እስትንፋስ ዳግም ኅያው ማድረግ የቤተ ክርስትያን ዋነኛው ዓላማ መሆን እንዳለበት ያሳሰቡ ሲሆን፦ "በታላቅ ደስታ የሁለተኛው የቫቲካን ጉባኤ 50ኛው ዓመትና የእምነት ዓመትን የምከፍትበት የዛሬው እለት እጅግ ደስ የሚያሰኝ ቀን ነው" በማለት የእለቱን ታላቅነት ገልጸዋል።

ቅዱስ አባታችን ኃሴት በተሞላበት መንፈሳዊነት የእምነት ዓመትን ሲያስጀምሩ ክርስቶስ የእምነታችን ማእከል መሆኑንና አበክረውም እግዚአብሔር በኢየሱስ ክርስቶስ አማካኝነት ለቤተ ክርስትያን የሰጠው ተልእኮ በደቀ መዛሙርቱ ላይ በመንፈስ ቅዱስ እፍ በማለት ቀጣይነቱን ያረጋገጠለትን ስብከተ ወንጌል ለዓለም የማቅረቡ ዓላማ ባለቤት ራሱ እግዚኣብሔር እንደሆነ፣ ቤተ ክርስትያንም ለዚህ የክርስቶስ ድንቅ ተግባር ተቀዳሚ የአገልግሎት መሣሪያ አስፍፈላጊ መሆንዋን አብራርተዋል።

ዘንድሮ የታወጀው የእምነት ዓመት ካለፉት 50 ዓመታት ማለትም ከሁለተኛው የቫቲካን ጉባኤ፣ እ.ኤ.አ. በ 1967 ዓ.ም. በእግዚአብሔር አገልጋይ ጳውሎስ ስድተኛ ሥልጣናዊ ትምህርት ከታወጀው የእምነት ዓመትና እ.ኤ.አ. በ 2000 የኢዮቤል ዓመት ምክንያት ር.ሊ.ጳ. ብፁዕ ዮሐንስ ጳውሎስ ዳግማዊ "ኢየሱስ ክርስቶስ ትላትና ዛሬ ነገም" ብቸኛው አዳኝ መሆኑንና ማእከልነቱን ዳግም ያስተጋቡበት ከጠቅላላ ከቤተ ክርስትያን ሂደት ጋር የተጣመረ መሆኑንም አብራርተዋል።

የእምነት ዓመት ማወጅ ጌታችን ኢየሱስ ክርስቶስ የመላው ዓለምና የታሪክ ማእከል መሆኑን በሚገልጠው በቤተ ክርስትያን ሥርወ እምነት ትምህርት ላይ በመወያየት እምነታችንን ጥያቄ ለማስገባት ሳይሆን፣ ይኸንን ዘወትር የሚኖር የማለይወጠውን ዘለዓለማዊው አንቀጸ ሃይማኖት ዳግም አሜን ለማለትና እማኔውን ለማስተጋባት ነው ሲሉ የገለጡት ቅዱስ አባታችን የሁለተኛው ቫቲካን ጉባኤን ትርጉም አስታውሰው፣ ይኽን አንቀጸ ሃይማኖት ማእከል በማድረግ እወጃው ወቅታዊው ዓለም ለሚያቀርበው አንገብጋቢ ጥያቄ መልስ የሚስጥ ነው፣ ሁለተኛው የቫቲካን ጉባኤ የእምነትን ውበት ማንጸባረቅ የሚለው የቤተ ክርስትያን ተልእኮን በተመለከተ ያሳየው የጋለና የሚማርክ ውይይት የእሳቸው ቀጥተኛ ተመክሮ እንደነበርም አስታውሰው፣ አስፈላጊው ጉዳይ "ቤተ ክርስትያን መንፈሳዊ ምድረ በዳነት ባጠቃው ወቅታዊው ዓለም ዳግም ክርስቶስን ማወጅ" የሚለውን ጥሪ መኖር ነው ብለዋል።

"ተቀዳሚው የቤተ ክርስትያን ዓለማ የሆነው ስብከተ ወንጌል፣ ያለምንም የመደናገር ፈተና በተጨባጩና ትክክለኛ በሆነው መንገድ ማለትም በሁለተኛው የቫቲካን ጉባኤ ውሳኔዎች ላይ ተመሥርቶ የሚከናወን መሆን አለበት፣ ስለዚህ ዳግም ወደ ሁለተኛው የቫቲካን ጉባኤ ሰነዶች መመለስና ማጤኑ አስፈላጊ ነው። ሁለተኛው የቫቲካን ጉባኤ በእምነት ላይ አዲስ ውጥን ያኖረ ሳይሆን የማይለወጠው እምነት በዚህ ዘገምታዊ ለውጥ በሚታይበት ዓለም ዳግም ሕያው ለማድረግ ምን መደረግ አለበት በሚለው ሃሳብ ላይ መወያየት ነው፣ ለዚህ ጥያቄ በተለያየ ውሳኔዎቹ መሠረት መልስ ሰጥቶበታል። በዚህ በምድረ በዳ በሆነው ዓለም በሕወታቸው ቃል የተገባውችውን መሬት የሚያመለክቱ ተስፋን የሚያጸኑ የእምነት ሰዎች እጅግ ያስፈልጋሉ፣ በሕይወት የሚኖር እምነት ልብን ከጨለምተኝነት ፈተና ለሚያላቅቀው ለእግዚአብሔር ጸጋ ክፍት ያደርጋል። ስብከተ ወንጌል ከምን ግዜም በበለጠ ዛሬ በእግዚአብሔር የተለወጠ መንገድን በሚጠቁም አዲስ ሕይወት መመስከር ማለት ነው" ብለዋል ቅዱስ አባታችን።

በመጨረሻም 20ኛው ዓመቱ በመታሰብ ላይ ያለው የካቶሊካዊት ቤተ ክርስትያን ትምህርተ ክርስቶስ "ቅድስት ድንግል ማርያም በስብከተ ወንጌል ጉዞ የመንገድ ብርሃነ ኮከብ ሁኚ" በማለት ያሰፈረውን ጸሎት በመድገም የእለቱ ስብከታቸውን ደምድመዋል።

ምንጭ፡- ራድዮ ቫቲካን

አድራሻችን

                 ገዳመ ቅዱስ ዮሴፍ ዘሲታውያን

                    ፖ.ሳ.ቁ. 21902
                 አዲስ አበባ - ኢትዮጵያ
             Phone: +251 (116) 461-435

              Fax +251 (116) 458-988

               contact@ethiocist.org

             http://www.ethiocist.org

 
 

ለድረ ገጻችን የሚሆን ጽሑፍ ካለዎ

1- የኢሜል አድራሻችንን contact@ethiocist.org ን ተጠቅመው አሊያም

2- ይህን ሲጫኑ በሚያገኙት CONTACT FORMበሚለው ቅጽ ላይ ጽሑፍዎን ለጥፈው ወይም 

3-facebook አድራሻችን https://www.facebook.com/ethiocist.org በግል መልእከት ይላኩልን

በተጨማሪም የሚያካፍሉት ጠቃሚ የድረገጽ አድራሻ ካለዎ ይላኩልን።