ቅ. ቍርባን የቤ/ያን የልብ ትርታና የእኔነት ፈውስ ነው

ቅዱስ ቍርባን የቤተ ክርስትያን ማእከልና የወቅቱ ግለኝነት ለሚያረምደው ባህል ማርከሻ ነው

ቅዱስ አባታችን ር.ሊ.ጳ. ቤኔዲክቶስ ፲፮ ኛው  ትላትና እሁድ ሰኔ ፲፱ ቀን ፳፻፫ ዓ.ም. እኩለ ቀን በቅዱስ ጴጥሮስ አደባባይ ከውጭ እና ከአገር ውስጥ ከተሰበሰበው በብዙ ሺ የሚገመቱ ምእመናን በተገኙበት መልአከ እግዚአብሔር ጸሎተ ከማሳረጋቸው በፊት እንደተለመደው ባቀረቡት ትምህርት ባለፈው ሐሙስ ሰኔ ፲፮ ቀን በመላ ካቶሊክ ቤተ ክርስትያን የተከበረው የቤተ ክርስትያን ማእከል የሆነው ቅዱስ ቍርባንን አስታውሰው በብዙ አገሮችም በዓሉ እሁድ ሰኔ ፲፱ ቀን ፳፻፫ ዓ.ም. መከበሩንም አስታውቀዋል፡፡ ቅዱስ ቍርባን ባይኖር ቤተ ክርስትያንም ባልኖረች ነበር ካሉ በኋላ፣ ይህ የጌታችን ቅዱስ ሥጋ እና ደም በዘመናችን እየተዛመተ ያለውን ግለኝነትን የተሳሳተ ራስ ወዳድነትን ማርከሻ መሆኑን ገልጠው፣ በዚህ አጋጣሚም በዕለቱ እንተ ላእለ ኵሉ ቤተ ክርስቲያን በሃምበርግ ሦስት የእምነት ሰማዕታት እና በሚላኖ ከተማ ብፅዕና የታወጀላቸው ሦስት የቤተ ክርስትያን ልጆችን በማስታወስ እግዚአብሔር እነዚህ አዲስ ብፁዓን ስለ ሰጠን ልናመሰግነው ይገባል እንዳሉ የቅድስት መንበር መግለጫ አመለከተ።

ቅዱስ ቍርባን የቤተ ክርስቲያን ማእከልና የልብ ትርታ መሆኑን አስረድተው፣

“ለቤተክርስቲያን የጌታችን ኢየሱስ ክርስቶስ ሥጋ እና ደም ማለትም፦ ምሥጢረ ቅዱስ ቍርባን እጅግ ውድ የሆነው ሃብት ነው። ቅዱስ ቍርባን የሰብአዊው ማኅበረሰብ የውኅደት ምሥጢር መሆኑ ገልጠው እግዚአብሔር ወደ ዓለም፣ ዓለም ወደ እግዚአብሔር የሚያደርስ ታላቅ ሚስጢር ነው” ብለዋል።
በዚህ በምእራቡ ኅብረተሰብ ጐልቶ እየታየ ያለው እና ወደ ሌላው የዓለማችን ክፍል በመዛመት ላይ ያላው የግለኝነት ባህልፈሴ እየተስፋፋ ባለበት ዘመን፣ ቅዱስ ቍርባን በአማኝ አዕምሮ፣ ቀልብ እና ልብ ውስጥ የሚሠራ የኅብረት እና የውህደት የአገልግሎት የመተሳሰብ እና ተካፍሎ የመኖር እውነታን በሌላ አነጋገር ወንጌላዊ አስተሳሰብን የሚያስፋፋና ግለኝነት ለሚለው ባህል ማርከሻ ነው።
ቀደምት ክርስቲያኖች በእየሩሳሌም በዚህ ወንጌላዊ ሥነ ሥርዓት ለሚመራው የአኗኗር ሥልት አብነት እርሱም አንድ ልብ እና አንድ አሳብ የእኔ የማይባልበት ሁሉ ነገር የጋራ ለእያንዳንዱ እንደ አስፈላጊነት የሚታደልበት በወንድማማችነት መንፈስ የተካነ ሕይወት አብነት መሆናቸው ዘክረው፣ የዚህ የአኗኗር ሥልት ምንጭ ቅዱስ ቁርባን መሆኑም ገልጠዋል፡፡ ቤተ ክርስትያን ባለፉት ዘመናት እና በአሁኑ ወቅት ምንም እንኳ የሰው ልጅ ፍጹም ያለመሆንና  ስህተቶች የሚታይበት ቢሆንም ቅሉ፣ ቅዱስ ቍርባን አሁንም የአንድነት ኃይል ነው። በፈላጭ ቆራጭ፣ አምባገነን ሥርዓተ መንግሥት ሠፍኖባቸው በነበሩት አገሮች ሕዝበ እግዚአብሔር አንድነቱን እና ውኅደቱን በሰንበት የሥርዓተ ቅዳሴ ማዕድ ዙሪያ ያረጋግጥ እንደነበር በማስታወስ፣ በአሁኑ ወቅት የግለኝነት ባህል የሚወልደው የሐሰት ነጻነት እጅግ አደገኛ ነው። ስለዚህ ከጌታችን ኢየሱስ ክርስቶስ ቅዱስ ሥጋ እና ደም ጋር የሚጸናው ከእርሱ ጋር በሚኖረው ህብረት ከሚገኘው ፈውስ እውነትን እና የጋራ ጥቅም የማፍቀር ፍላጎት ያጎናጽፈናል ብለዋል።
በመጨረሻም ር.ሊ.ጳ. ብፁዕ ዮሐንስ ጳውሎስ ዳግማዊ “ቅድስት ድንግል ማርያም የቅዱስ ቍርባን ሴት በማለት” ለጌታችን ኢየሱስ ክርስቶስ እናት የሰጡትን ጥልቅ ሥያሜ አስታውሰው፣ ሕይወታችን የዚህችን ቅድስት እናት አብነት በመከተል ቅዱስ ቍርባናዊ ሕይወት እናድርገው፤ ይህም ከእግዚአብሔር እና ከሌሎች ጋር ህብረትን እንድንፈጥር የሚረዳን ይሆን ዘንድ ጸልየው፣ መልአከ እግዚአብሔር ጸሎትን ጸልየው እንዳበቁ፣ በዕለቱ ካቶሊካዊት ቤተ ክርስትያን ብፅዕና ያወጀችላቸው የቤተ ክርስትያን ልጆች በማስታወስ፣ የቅዱስ ጴጥሮስ ተከታይ የሚያከናውነው ሐዋርያዊ አገልግሎት እና ግብረ ሠናይ አመርቂ እንዲሆን በጸሎት እና በምጽዋት ድጋፋቸውን ለሚያቀርቡት ሁሉ አመስግነዋል፣ ቀጥለውም በፓላንድ የቭሎችሎወክ ሰበካ የተመሠረተበት 600 ኛው ዓመት ክብረ በዓል ዘክረው፣ የቅዱሳን አበውን እምነት ተቀብለን በመኖርና በመመሥከር ዕለት በዕለት ክርስቶስ የሚኖርበትን ሕይወት እንድንኖር በማበረታታት ሐዋርያዊ ቡራኬ ከሰጡ በኋላ መልካም እሁድ ተመኝተው ሁሉንም ወደ መጡበት ሸኝተዋል።

 

ምንጭ፡ ራድዮ ቫቲካን

አድራሻችን

                 ገዳመ ቅዱስ ዮሴፍ ዘሲታውያን

                    ፖ.ሳ.ቁ. 21902
                 አዲስ አበባ - ኢትዮጵያ
             Phone: +251 (116) 461-435

              Fax +251 (116) 458-988

               contact@ethiocist.org

             http://www.ethiocist.org

 
 

ለድረ ገጻችን የሚሆን ጽሑፍ ካለዎ

1- የኢሜል አድራሻችንን contact@ethiocist.org ን ተጠቅመው አሊያም

2- ይህን ሲጫኑ በሚያገኙት CONTACT FORMበሚለው ቅጽ ላይ ጽሑፍዎን ለጥፈው ወይም 

3-facebook አድራሻችን https://www.facebook.com/ethiocist.org በግል መልእከት ይላኩልን

በተጨማሪም የሚያካፍሉት ጠቃሚ የድረገጽ አድራሻ ካለዎ ይላኩልን።